TENA HARANERAKO TXANGOA (Abenduaren 5etik 8ra)

Sergiok Berton aldizkarira bidali eta argitaratutako kronika:

Txango honetan 42 lagun bildu ginen ia euskal herrialde guztietatik. Baños de Panticosa base, maila ezberdinetako hainbat txango abiatu genituen: larunbatean, eguraldi txarragatik ere, Bachimañako aterpera, Bacias mendira eta Panticosa herrira; igandean, azkenik Eguzki Amandreak lagun, Tebarray mendira, Anayet erpinera, Portalet harantxora eta Escarra urtegira; eta astelehenean, ekia eta eurijasak tartekatuta, Bachimañako eta Riperako aterpeetara, Brazato urtegira eta Sallent de Gallego herrira.

Elkarrizketa Bizkaia Irratian

2014ko maiatzaren hasieran Bizkaia Irratian egindako elkarrizketa Pirinioetako zeharkaldiaren gainean.

Ezkaraiko kronika

Behean Sergiok Berton aldizkarira bidali eta argitaratutako kronika.

 

EZKARAI

Infernutik zerura egunbetean

Otsaileko lehen astebururan Lizardi Mintza Taldeko 38 lagun Ezkarai aldean ibili ginen Valdezcaray eski estazioko pistetan eta inguruko mendietan eskiz, sarepalez eta oinez. Larunbatean, baldintzak ezin okerragoak: urakan haizea, ilar purea eta harrizko elurra. Gozatu baino, gehiago pairatu egin genuen mendia. Haatik, gauak 10 cm-ko tertziopelozko hauts elur geruza zoragarria eta egun bare eta garbia utzi zuen, zinez gozatzekoa, bezperako zigorraren ordaina bailitzan.

2013ko kronikak

Behean 2013an Sergiok Berton aldizkarira bidali eta argitaratutako kronikak.

ALTO CAMPOO

Otsailaren 1 eta 3 egunen artean Lizardi Mintza Taldeko 33 lagun ibili ginen Alto Campoo aldeko eski estazioan eta inguruetan eskiz, sarepalaz eta oinez. Larunbatean nahiko eguraldi txarra egin zigun, elurra, haizea eta lanbroa, baina botatako hauts elur geruza behintzat eskiatzeko ona zen, eta mendiko eskiatzaile batzuk Tres Mares mendira igotzera animatu ziren. Igandean, ostera, eguraldia erabat aldatu zuen: haizerik ez, oskarbia eta eguzkia, bezperan ez bezala, eguna probetxatzeko ezin aproposagoa, eta lagun batzuek aurreko egunekoek egin zutena, Tres Mares mendira igo, egin zuten, baina oraingoan inguruko ikuspegi zoragarriaz gozatuz.

GARRALDA

Benetan ekintza anitzekoa, gure irteera hau: larunbat goizean, Koronas mendirako igoera (eskiz eta elur sarepalez), ibilbidea haraneko bide elurtuetan zehar, ipar eski klasea Abodiko pistetan eta bertako dantzen ikastarotxoa Garraldan; arratsean, Gartxot filmaren ikuskizuna eta kalejira-kantapoteoa Garraldako tabernetan; gauean, herri afari oparoa eta kanta-afaloste bizia 5ak arte; eta igande goizean, gautxoriak gautxori, Koronas mendia (elur berriz) eta haraneko ibilbidetxoa.

BELAGUA

Abenduko asteburu luzean, Lizardi Mintza Taldeko 23 lagun, Belagua aldean ibili ginen, Izabako aterpetxe batean ostatatuta, ekintza ezberdinak burutzen: mendi txangoak egiten, eskiz, sarepalez edota oinez, Auñamendi, Ezkaurre, Lakora eta Txamantxoia gailurretara; ipar eskia ikas-irakatsi eta praktikatzen, Braca, Ferial eta Zanpori pistetan; alpetar eskiari ematen, San Martinen Harria eski estazioan; eta osteratxoren bat egiten ere bai, Izaba inguruan. Eta dena eguraldi ezin hobea lagun.

BIZITZA BERA KASUALIDADEA DA

Frantsesa ikasteari ekin diot aurten. Urte sabatikorako planak ditut, bai horixe, besteak beste proiektu bitxi bat: ikasitako frantsesa Afrikan praktikan jarri nahi dut. Doinu kuriosoa izango du kontinente beltzean ikasitako frantsesak, doinu beltza akaso?

Gaur, frantses eskolak amaitutakoan ikaskide batek esan du, aspalditik ez dator Goizalde Landabaso.

Izena zintzilik geratu zait buruan nonbait. Izen hori ezaguna dut dudarik gabe baina, zertaz ezaguna ordea? Berriro ere madarikatu dut memoriak burmuinean sortu didan zulo beltz amaigabea. Bertan murgiltzen naiz izenari aurpegia jarri nahian, baina alferrik.

Bizikletaz igo naiz etxera. Hotzari muzin eginez, bizi-etxeratu naiz. Bai, ezagutu egiten dut, nik izen hori lehenago entzuna dut baina non? Pentsatzen ari naizela logelara abiatu naiz.

Mesanotxetik, gauero bezala, liburu batek agurtu egiten nau. Gau-mahaitik, gauero bezala, Goizalde Landabasoren Bränskint izenburuko liburuak agurtu egiten nau.

Lagun batek erosi zuen gure proiektu bidaiarirako eta eskaini zidan. Zabaldu nuen liburu berri batek eskatzen duen errituala adierazita, non zentzu guztiek parte hartu behar duten, ukitu, usaindu, ikusi, entzun eta dastatu egin nuen edota ikusi, ukitu,entzun, dastatu eta usaindu egin nuen… Zentzumen guztien gainetik ordea bat gailentzen zen dudarik gabe. Aritz Eiguren irudigileak Goizaldek eskribitutakoa zuri-beltzean irudikatzen zuen. Noizean behin pintzelari iluntasunez lepo dagoelarik gorri edo hori pitin batek ihes egiten dio. Eta hain da bakana ezen berehala protagonismoa hartzen baitu txinparta izango balitz bezala.

Hasiera batean irudi zitzaidan liburuak aurka egin zidala eta ixteko etengabeko joera hartzen zuela baina, berehala, amore eman zuen. Poesia…garai ilunak poesiarako, langabezia, iruzurra, politikoena zein existitzen ez diren printzeena, dispertsioa, tratu txarrak, futbolezko izarrak…ez, ez dira poesiarako garai erosoak.

Zazpi kaleetan paseoan nabil. Gabonetako argien dirdirak Piazzolaren gitarra-soinuak dantzatzen alegintzen dira. Ondoko erakusleihoan urrezko Rolex batek mesfidantzaz begiztatzen du. Gitarrari ozpindutako ardo merkearen hatsa dario. Sokei atzazaletako kraka itsasten zaie. Bizitzak musikaria gogor zigortu arren oraindik ere duintasuna du airean zabaldutako Piazzolaren tangoak. Bränskint Bilbon dago, Bränskint edonon egon daiteke. Bihartik aurrera Bränskint Erloko gutunontzian babestua egongo da, dastatu, usaindu, ukitu, entzun edota ikusi nahi duenarentzat askea izango da. Goza dezala.

FW: galdera blogari buruz

 

---

From: andoaek@hotmail.es
To: ordizia@aek.org
Subject: galdera blogari buruz
Date: Wed, 30 Nov 2011 19:30:45 +0200

Kaixo lagunak!
 
Blog bat egin nahi dugu eta gustatuko litzaiguke ondorengo galderak eratzutea.
 
Adibidez:
 
-  Zergatik sortu zenuten blog bat?
-  Euskaltegi osoak parte hartzen al du?
-  Zerri buruz idazten duzue?
-  Zer maiztasunarekin idazten duzue?
-  Blogean idaztea, erraza ala zaila al da?
-  Badaukazu arduradun bat? eta beti da berdina?
-  Iruzkin asko jasotzen duzue?
 
Zuen erantzunaren zain gaude.
 
Besarkada bat eta eskerrik asko!!
 
 
       Andoaingo euskaltegiko ikasleak
 

Lmt Zuriza 2011 Infernuko kronika

Lizardimt labean. Echo-Belagua zeharkaldia.

Echo-tik Belaguaraino, haranez haran ibili gara, antzinako ibiltarien bide beretatik. Artzainek, zamariek (kontrabandistak deritzenek), espartingileek (enarak), iheslariek eta beste hainbatek utzitako aztarnak jarraitu ditugu, kontu kontari edo.

Asteburu gogorra izan dugu, bero itzela, eguzkia lagun mina, hego haizea gure kontra, baina dena kontrolpean eta arazorik gabe. Gutxi batzuek sufritu egin dute eta besteok hobeto ibili gara, kontu kontari edo. Azkenean, denok gustura.

Honetan kide berri batzuk etorri dira gurekin. Kexaka, ez etsita, aurrera beti, umore onean ibili dira. Eskertzekoa azaldu duten jarrera ezin hobea. Ohikoei ere eskerrik asko, ezohiko egoera hori gainditzeko emandako laguntzagatik eta jarreragatik.

Larunbatean Echo haranera iritsi eta ‘Infernuko Ahoa’ alboan, Santa Ana Zubian, Camille seinaleak jarraitu genituen. Eta benetako infernuko eztarrian sartu ginen. Aldapan gora-gora, ur gabe, Lenito Beheko leporaino. Basoan zehar jaitsi eta berriro gorantz Alanoserantz. Achar de Alanos pasabide ikusgarria zeharkatu ondoren, Taxeras alde batera utzi eta Zurizako aterpera heldu ginen, batzuk justu-justu afaltzera. Gero, garagardotan harrapatu gintuen gaueko ilargiak, oso merezitako atsedenaldian.

Igandean goiz altxatu, berrindartuta, gosaldu eta berriro erasora. Camile Xtrem mendi lasterketa hor inguruan, eta geu ere xtrem ibili ginen (lizardimt xtrem). Gehienok, enaren bidea hartu genuen, goitik behera, kontrapasan.

Juan Pitotik abiatuta Arrakogoitira. Paisaia ikusgarria, Anie, Hiru Erregeen Mahaia, Ezkaurre, Alanoak, ... Gero, Lapatia, hor Otsogorrigaina begi bistan. Goiko zelaiak atzean utzita, basoan zehar, Ekialterrea, Martinberroa, bunkerra, Ardibidegainea, kontrabandisten pasabidea eta Izabako begiratokia.

Gure ohiturei jarraituz, taldeka, sakabanatuta, eta banan-banan ere bai. Amaieran, Izaban berriro elkartu, onki xinak izan, azala eta barrukoa freskatu, autobusean zenbaketa egin, -denok gaude? bai-, eta gidariari eskatu -‘eraman gaitzazu etxera, mesedez’-.

Esker anitz guztioi eta izan onki. Hurren arte.